قصيدة عن العراق الجريح

من طرف **nice_yongman** 2007-10-22, 4:46 am

المراجيــــــــح

قيس سعدون الشمّري

مراجيح الحدايق تبجي عالاطفـــال
تدوّر عالفرح والفرح ناسيهـــه
شنتمرجح يبويه ... مر علينه العيد
ومرجوحة لعبنه حبال مابيهـــه
گطعته الشظايه ورمية القنــــــاص
أكد عالحبل جيشافكـــــم بيهـــــه
وذبل ورد الحدايق طار منه الطيــر
وبگت بس الكواغد تعتني ليهــه
وعصافير الاشجارالراح عنه النوم
جنحهه تكسرت...منهو اليداويهه
وتغير لونه ... بدخان المجيميــــن
يوميه خبر عاجــــــل ملاگيهـــه
وحمامات السلام الصارتنه غراب
تنعق بالسمه وبالگـــاع حاديهه
وعيون الشوارع سـره بيه الليــل
تبجي عالامـــان الجان ماليهـــه
وبجه البلام من شاف الجسرمگطوع
حس عينه أنطفت ماظل دمع بيهه
لان مادنّكَ جسرنه ... وأنحنه للمــاي
جان الماي . . . يتمنه يصل ليهه
يفر بينه الوكت تيهنه حته الراي
إلمن نلتفت ... وإلمن نحاجيهـــه
شسولف والسوالف تفضح الاسرار
باگو بالظهر حته تراجيهــــــــــه
عروستنه الجميلة ... لمگذلـه بغداد
تنباع برخص الرهـاب يشريهــه
نعرات وطوائف وقتل ياهو الجان
ياهو الجابهه ... وفسر معانيهـه
غَم هذا الوكت ...ابن اليبيع ارباه
مو أمك شگت هيجي تجازيهـــه؟!
لا غزّر الزاد ولا ملحهه ويـــــاك
ولا زاجي الرضعته وهاي تاليهه؟!
ظل ينزف جرحنه جروح فوكَ أجروح
وحدر خيط الجرح خزّنت تدريهـه
حط ايدك أبيدي ... ننبـذ لرهــاب
والاحقاد الدفينه ... بركن خليهــه
وخل تسبح جبال أدهوك بالحَمّار
وخل ايفيض خير وكلهه يسكيهه
وخل أتزور بصرتنه صلاح الدين
وخل الدين راية ... ونقتدي بيهه

لتبخلون علينا بردودكم اهم شي انشوف رايكم